撰文：Wantedly編集部
唔知有幾多人大學嗰陣有上莊同住hall？有時筆者都好掛住一大班人共同努力去達成一個目標嘅感覺！可惜現實就係職場嘅同事根本談不上係朋友，做嘅野又好似對社會冇咩貢獻……咁又唔使灰心嘅，其實香港仲有一啲工種係大家好似圍村咁住埋一齊，為咗幫助下一代而盡力，講緊嘅就係Outward Bound（外展訓練）！
Outward Bound教練最終目標要做隱形人？！
外展訓練係籍住戶外活動，例如獨木舟、行山同帆船等工具，令參加者從中更加認識自己既長短處。每次嘅外展訓練都係由Outdoor Instructor帶領，而外展訓練嘅信念係You are more than you know，所以教練除咗教參加者基本野外知識之外，仲會喺過程中引導佢哋思考，令佢哋更了解自己，慢慢去突破自我框架。
人才發展部主管阿平話教練一開始的確係「老師」，但當同學掌握到基本野外技巧同知識嘅時候，就可以後退一步做「旁觀者」。「到最後教練做隱形人，而學生又tackle到所有問題，呢個先係教練嘅滿足感。」喺課程中有任何問題出現，教練都會引導同學傾返成件事，俾參加者分享自己感受同睇法，而唔係好似訓導主任又或者法官咁要分「對與錯」。
▲ 唔少戶外活動都可以令參加者明白到團結嘅重要性
運動健將一定做到外展教練？唔係㗎！
帶班經常要喺戶外生活，阿平就強調喜歡大自然同運動，同鍾意做外展教練完全係兩碼子嘅事。佢哋請人嘅時候最著重嘅係熱誠同態度：「我會好睇個『心』，應徵者要有想啟發人嘅心。」而Project Manager Wylie就話最緊要係身教，因為參加者由10幾歲到60歲都有，年輕嘅教練都有時會擔心唔知點教啲年紀較大嘅參加者，佢就話：「最重要真係想正面咁去影響其他人，只要身體力行一定可以打動參加者。」唔講唔知，原來有好多教練以前都係外展嘅學生，因為當年有所得著先想加入Outward Bound幫助唔同嘅群體。
如果自己可以為其他人帶嚟正面影響，相信都係一件好有滿足感嘅事。而外展訓練正正集合一班想幫助社會上唔同群體嘅人，即使大家興趣完全唔同，但都會一齊努力為呢個目標進發。叫佢哋形容一下工作氣氛，佢哋都各有見解。Wylie話似大學住hall，大家放工就會一齊過，social life好緊密，關係絕對「比同事多」。阿平就話似圍村， 成個basecamp都係自己人。而Fundraising Manager Angel就覺得係一家人，即使大家性格唔同，但都有想啟發別人嘅DNA。
▲ 大家住埋一齊，而宿舍就係對住呢個咁靚嘅大自然
想做教練？首先要經過100日挑戰！
如果你真係好有心想做Outdoor Instructor，唔使怕自己冇資格，因為外展訓練有一系列嘅training，幫你完全裝備好自己先開始帶班。有興趣嘅人士首先要通過selection day，再要完成14日嘅Instructor Development Course，先可以參加之後100日嘅訓練。
100日訓練會有齊hard skills同soft skills課程，教你點樣面對唔同嘅參加者，例如小朋友、在職人士、更生人士、釋囚同戒毒人士等等...。同時都會製造一啲突發情況去考驗你嘅應變能力。每一節訓練完結，佢哋都會寫返個training report話你知有咩要改善。所以100日訓練完結之後，大家都準備好做outdoor instructor！之後亦會安排其他senior instructor同你一齊去帶班，make sure 你能夠handle唔同嘅狀況。由完成訓練到獨立帶班大概需要9個月至1年時間。
阿平話：「長時間嘅訓練對我哋嚟講係一個大嘅投資，但亦都係一個好好嘅篩選過程，因為留低嘅人都堅係有心做嘅。」佢都話如果過到100日訓練，基本上已經係受聘。對於入職較耐嘅同事，公司都會因應社會需求去提供唔同嘅課程，例如引入外國嘅教育方式，又或者對住殘疾人士同SEN學童嘅特別帶班技巧，希望令佢哋繼續進步。
▲（左起）人才發展部主管Ping Law、項目經理Wylie Hui，及籌款經理Angel Ng
入學校做又得 做紀律部隊亦得
大家可能會覺得外展訓練呢個行業好專門，擔心未來冇咩晉升機會。但Angel就話內部嚟講，半年至1年就可以升上高一級嘅instructor, 教新加入嘅同事。之後仲可以轉做programme coordinator，幫手制定課程同埋協助同事。由於外展訓練喺不同外國地區都有分校，香港區嘅同事都有機會過去exchange，帶新嘅元素比香港課程。
3位都喺外展訓練做咗好耐，佢哋都坦言有7至8成嘅同事冇繼續留守，但大部份都有唔錯嘅發展。原來做過外展訓練係好吃香，甚至對學校或其他大機構都好吸引。「近年多咗好多學校同企業發展課外活動或者體驗式嘅coperate training，佢哋都會想請有相關經驗嘅人去帶領。」阿平都話CV上面寫住做過外展訓練，就連見工都會引人問多幾條問題，唔講唔知，有唔少同事亦成功去咗做紀律部隊！
▲ 香港區嘅同事去德國Outward Bound exchange！
Outward Bound未來想幫助更多本地學校參與課程
外展訓練學校未來都想幫助社會上唔同嘅群組，例如頭先提到嘅殘疾人士同退休人士。針對現有嘅學生群體，佢哋都想推動多啲。
Angel話：「每年有30萬個中學生，但我哋只係服務到3,000個，只係杯水車薪。」
Wylie就話：「其實香港係有好多資助俾學生參加外展訓練，但佢哋唔夠人手，所以好期待有更多想以『生命影響生命』嘅熱血人士加入呀！」
Comments